पुणे : मराठी विज्ञान परिषद व ‘आयसर’तर्फे ‘सायन्स गप्पा’ या कार्यक्रमाचे आयोजन करण्यात आले आहे. यामध्ये विज्ञानप्रेमींना आयसर येथील शास्त्रज्ञ डॉ. विनिता बाळ यांच्याशी संवाद साधण्याची संधी उपलब्ध होणार आहे. ‘जीवविज्ञान–एक बायकी दृष्टिकोन’ या विषयावर हा गप्पांचा कार्यक्रम रंगणार आहे.
पुण्यातील मराठी विज्ञान परिषद, इंडियन इन्स्टिट्यूट ऑफ सायंटिफिक अँड एज्युकेशनल रिसर्च (आयसर) आणि गरवारे महाविद्यालय यांच्या संयुक्त विद्यमाने या कार्यक्रमाचे आयोजन केले जाते. हा कार्यक्रम सर्वांसाठी विनामूल्य खुला आहे. अधिकाधिक विद्यार्थी, नागरिक यांनी सहभागी व्हावे, असे आवाहन मराठी विज्ञान परिषदेचे कार्याध्यक्ष यशवंत घारपुरे यांनी केले आहे.
दहावी-बारावीच्या निकालासह सर्वच क्षेत्रात मुलींची, महिलांची प्रगती लक्षणीय असते. तरीही जीवविज्ञानासारख्या विषयात प्राध्यापक महिलांची संख्या प्राध्यापक पुरुषांच्या तुलनेत कमी का आढळते? या असंतुलनाला आपली संस्कृती आणि आपला समाज कारणीभूत आहे का? जगभर काय परिस्थिती आहे? हे असंतुलन फक्त आकड्यात दिसते की संशोधनांवरही याचा परिणाम घडू शकतो? तसे होत असेल तर ते टाळण्यासाठी काय करायला हवे? सामाजिक परिस्थितीत बदल घडला तर संशोधनातील गुणवत्ताही बदलेल, असं म्हणणं सयुक्तिक ठरेल का, अशा अनेक प्रश्नांवर डॉ. विनिता बाळ साधकबाधक चर्चा करणार आहेत.
कार्यक्रमाविषयी :
दिवस : शुक्रवार, १४ जुलै २०१७
वेळ : सायंकाळी ६.१५ वाजता
स्थळ : कर्वे रस्त्यावरील गरवारे महाविद्यालयाचे सभागृह, पुणे
